დევნილები და ვეტერანები

არაერთი გამოწვევისა და ამოცანის წინაშე მდგარი ქართული სახელმწიფოსათვის დღემდე გადაუჭრელ პრობლემად რჩება იძულებით ადგილნაცვალ პირთა (ლტოლვილთა) ადექვატურ და ადამიანის შესაფერის გარემოში განსახლების და ერთიან სამოქალაქო სივრცეში ღირსეული ინტეგრირების საკითხი.

მრავალი დაპირებისა და გამოთქმული მზადყოფნის მიუხედავად, ხელისუფლება სამწუხაროდ ვერ ან არ იქცა გარანტად დევნილთა უფლებების დაცვის საქმეში. მეტიც, დედაქალაქში არსებული დევნილთა ჩასახლებებიდან მოსახლეობის გამოყვანა გადაიზარდა დევნილი მოქალაქეების გამოყრა-გამოძევების პროცესში, რომელსაც თან ახლდა მოქალაქეთა ღირსების შემლახავი ქმედებები, რითაც დაირღვა ადამიანის უფლებები.

ამასთან, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინიტრომ უგულებელყო მთელი რიგი ვალდებულებები. კერძოდ, სამინისტრომ დაარღვია დევნილთა გამოსახლების სტანდარტული ოპერაციული პროცედურების მე-6 პუნქტი, რომლის თანახმად სამინისტროს ეკრძალებოდა პოლიციისათვის გამოსახლების თაობაზე წერილის გაგზავნა, რადგან გამოსახლებულებს არ მიუღიათ საცხოვრებელი ფართობების სანაცვლო ფინანსური კომპენსაცია. ამასთან დევნილთა უფლებები დაირღვა, რადგან გამოსახლების შესახებ მათ ამცნეს პროცესამდე რამდენიმე საათით ადრე, ხოლო უშუალოდ გამოსახლება მოხდა პატივისა და ღირსების შემლახველი ფორმით, კერძოდ სატვირთო ავტომობილებით.

ქრისტიან-დემოკრატიული მოძრაობის ლიდერები, პარალმენტის და თბილისის საკრებულოს წარმოადგენლები (პარტიის შესაბამის სამსახურებთან ერთად) აქტიურად იყვნენ ჩართული დევნილთა თემატიკასთან დაკავშირებულ საქმიანობაში, მათ შორის აქტიურად ხორციელდებოდა მონიტორინგი როგორც სამინისტროსა და დევნილებს შორის გამართული კონსულტაციებისა, ისე უშუალოდ გამოსახლების პროცესის, რასაც მიეძღვნა მოძრაობის სახელით გაკეთებული არაერთი განცხადება და პრეს-კონფერენცია.

ქრისტიან–დემოკრატებმა გააკრიტიკეს მთავრობის 854-ე განკარგულება, რომლის თანახმადაც, ნებაყოფლობით საცხოვრებლის ან კომპენსაციის მიღების შემდეგ დევნილს ეკონომიკური დახმარება შეუწყდება.

დევნილების თემასთან ერთად ქრისტიან-დემოკრატიული მოძრაობა აქტიურად მუშაობს ვეტერანების საკითხზე. ქდმ-მ დაგმო 3 იანვარს, გმირთა მოედანზე, სოციალური შეღავათების აღდგენის მოთხოვნით მიმდინარე ვეტერანების აქციის დარბევა და ხელისუფლებას ძალის გამოყენების ნაცვლად მათი მოთხოვნების გათვალისწინება ურჩია. მოძრაობის წევრები დაარსების პირველი დღეებიდანვე ვეტერანებთან ერთად მუშაობენ იმ პრობლემების მოგვარებაზე, რაც ძალოვანი სტრუქტურების 50 ათასამდე პენსიონერს და ვეტერანს უკავშირდება. ქრისტიან-დემოკრატიულ მოძრაობაში ძალოვანი სტრუქტურების პენსიონერთა და ვეტერანთა კომიტეტი მუშაობს.